話說我係個名符其實嘅超級美劇迷。
我睇美劇嘅速度同數量的確驚人。前幾日我睇咗一齣 Netflix 叫The Affairs。顧名思義，婚外情就係成齣劇嘅伏線。前夫拎返啲嘢比已出軌嘅前妻，對話如下。
眼淚正在眼眶打轉嘅前夫：Are you ever coming home?
帶歉意但決不回頭嘅前妻：I don’t think so. I am sorry.
深了一個呼吸而雙眼通紅嘅前夫：That’s ok. I just needed to hear that.
我個鼻瞬間即酸，我都曾經試過就算知道大局已定，仍然要搲難塊面走去問清楚，就算明知佢唔再愛我什麼都是一個藉口都好，仍然覺得一定要知道一個被判死刑嘅答案，親手俾對方大大力打一巴掌先可以令到自己心死。
死心，令人默默流淚，將淚水吞下而不會放聲大哭；死心，係痛到無言；死心，係夜闌人靜嘅時候，就算哭濕枕頭都唔能夠安撫心裏半分難過。死心，係永遠都無終結嘅一日。
死心同放下嘅唔同係，一個人死心比較對人嘅否定多於對事，焦點好大部份都放咗喺自己嘅情感所以無法釋懷。一個人能夠放下，比較對事嘅否定多於對人，能夠理性啲去了解而明白為何要要暫時放手，會覺得係timimng或者外在因素因而影響結果。
咁究竟如何令自己”放下”而唔係”死心”呢？
首先，要令自己退到最後，再從局外者身分再了解一次事件始末。請你靜心諗一諗，究竟佢點解會出軌，點解成日要講大話，點解鍾意同其他人搞曖昧...除咗佢鹹濕佢PK之外，你自己又有無啲嘢其實可以更加好配合或者做好啲呢？如果自己都未做好嘅就自己好好反省，如果你話我問心無愧已經盡力做好咁就重點黎喇。
其實當一個人講得出”我已經對你死心”，就表示你已經盡力做咗一切，但係仍然得唔到你認為對方應有嘅回應，又或是一齊你得唔到快樂。假設你買咗對高踭鞋，顏色同款式都係你一直期待嘅，而且係名牌價值不菲。你着過一次出街之後刮腳刮到PK，然後你就發現原來呢對鞋唔係好啱你腳型，唔癡膠布着唔到之餘，仲唔可以着多過三個鐘。但係你又唔憤氣，明明係名牌，著上腳唔郁嘅時候又好睇，點解可以咁痛㗎！於是死要試多幾次。
可惜試多幾次之後都發現真係搞唔掂，但係揼咗佢又唔捨得（有血有汗有錢!），唯有將佢收入鞋櫃，硬係覺得終有一日仍然會有機會着起佢（其實根本就唔會)。呢種明知無可能，但係間中又要打開鞋櫃望一望佢嘅，望完佢又要唔開心，你理智上的確係叫死心，但心總係無法釋懷唔甘心。又或者你覺得雖然花咗錢但係唔啱就終歸唔啱，無謂令自己受皮肉之苦，當上一課知道原來呢個牌子嘅鞋係唔啱自已去己嘅腳型，所以決定送俾人又好放比人好，然後自己買過另一對新鞋，呢種大概叫做放下。歸根究底，鞋本身無問題，你腳板亦都無問題，只係配對錯timing唔啱而已。
所謂放下，就係既然曾經拎起過，發現盡咗力都做唔到，就決定理智地放低。真正嘅放下應該係無論結果好與壞成與敗都好，心情仍然係平靜。正如嗰塊puzzle嗰凹位根本唔啱，你夾硬嚟都唔會令你完成到塊砌圖。所以你只要退後一步望清楚整個picture，用輕鬆而有智慧嘅心情放低唔啱嘅拼圖，再慢慢搵番塊啱嘅拼落去，一步一步就自然會開花結果。
我前男友出軌，開頭我都低落沮喪過，甚至會blame自己唔夠好。直至佢同個女仔訂婚嘅時候，我竟然真正放下。當下嘅我並唔係因為覺得自己再無機會，而係我終於能夠退後一步望清楚成個局面，原來佢哋先至係應該相愛嘅一對，本人先至係阻住地球轉嗰個，再而令我開始明白同相信我嘅另一半一定係另有其人。仍然記得放下當刻我感受到從未試過嘅自在同輕鬆。
當然事情永遠無咁簡單，人嘅念頭，是念念不忘。但係人生苦短，總有一日你默然回首，無風雨也無晴，你就真係走出來了！
共勉之。
#你今日放下了嗎 #女人像鹽 Netflix
Search